8 lykilmál

Við munum vinna með þeim öflugu aðilum sem eru þegar með starfsemi á Akureyri til að ýta undir vöxt og aukin tækifæri ásamt því að greiða leið nýrra aðila inn á svæðið sem eru tilbúnir að fjárfesta og skapa störf.

Þá munum við einfalda regluverk og lækka fasteignagjöld til að styðja lítil og meðalstór fyrirtæki og þannig auðvelda smærri atvinnurekendum reksturinn og auka líkurnar á því að fólk leggi í að reka fyrirtæki, t.d. þjónustufyrirtæki innan hverfa, svo sem kaffihús, bakarí, veitingastaði og sjoppur.

Akureyri þarf að mynda sterkt mótvægi við höfuðborgarsvæðið. Þar erum við öll í sama liði og ættum að einsetja okkur að styðja við norðlensk fyrirtæki og versla í heimabyggð þegar kostur er til þess að efla efnahagslífið á Norðurlandi.

Uppbygging hefur verið kröftug og gengið vel undanfarin ár með tilheyrandi lífskjarabótum fyrir íbúa Akureyrar. Þar má nefna nýja flugstöð á Akureyrarflugvelli, Norðurtorg, Austurbrú, Siglingahús Nökkva, ný verslun Krónunnar, nýja heilsugæslu í Sunnuhlíð, nýtt gagnaver atNorth og Holtahverfi. Það eru einnig spennandi verkefni í gangi eins og Móahverfi, uppbygging er að hefjast á Tjaldsvæðisreitnum, í Hofsbót, á bryggjunni, hugmyndasamkeppni er farin af stað um framtíðarþróun Akureyrarvallar og nýtt hverfi vestan Hagahverfis er í undirbúningi.

Við þurfum að halda þessari þróun áfram og jafnvel bæta í. Það þarf að auka framboð íbúða í öllum verðflokkum með áherslu á hagkvæmt húsnæði og fyrstu kaupendur. En einnig fjölga möguleikum fyrir eldra fólk sem vill minnka við sig og losa þannig stórar eignir í eftirsóttum hverfum. Því vantar búsetukjarna fyrir eldra fólk og unnið verður með þróunaraðilum að finna því stað sem allra fyrst.

Hverfin eiga að vera fjölskylduvæn og innihalda þjónustu. Þess vegna þarf að bæta rekstarumhverfi lítilla fyrirtækja.

Hraða þarf uppbyggingu innviða í nýjum hverfum og standa við okkar hlut í uppbyggingu þannig að lóðir séu byggingarhæfar á tilsettum tíma og götur, gangstéttar og leikskólar séu til staðar fyrir íbúa nýrra hverfa.

Ein einfaldasta aðgerðin sem við getum framkvæmt til að ýta undir uppbyggingu og fjölgun íbúða í bænum er að fresta álagningu opinberra gjalda og dreifa þeim yfir byggingartímann. Akureyrarbær er miklu betur í stakk búinn til fjármögnunar heldur en einstaklingar sem eru að byggja sér einbýlishús og léttir því töluvert undir hjá fólki sem stendur í húsbyggingum.

Skipulagsmál þurfa að vera hugsuð til lengri tíma en eitt kjörtímabil í senn og best væri að vera alltaf tilbúin með skipulag til að mæta sveiflum í íbúaþróun og uppbyggingu atvinnulífs.

Akureyri á að vera besti staðurinn til að ala upp börn. Því ætti að taka inn í leikskóla tvisvar á ári, svo ekki sé mismunað börnum eftir fæðingartíma þeirra.

Akureyrarmódelið hefur virkað vel en það mætti auka sveigjanleika í vistunartíma og sumarleyfum til að koma til móts við ólíkar þarfir foreldra.

Skólalóðir og byggingar hafa fengið góða yfirhalningu á undanförnum árum en við þurfum að gera betur í sértækum stuðningi við nemendur og kennara innan skólanna.

Við þurfum að tryggja aðgengi að menntun fyrir tónlistarkennara og aukið samstarf milli tónlistarskólanna og hinna hefðbundnu skóla og aðra viðburðahaldara til að fjölga tækifærum fyrir ungt tónlistarfólk til að koma fram og efla sig. Til dæmis með því að kenna börnunum okkar að ball er ekki bara að spila Spotify í hátalara.

Bættar flugsamgöngur leika lykilhlutverk í að efla ferðaþjónustu og atvinnulífið á svæðinu, bæta lífsskilyrði íbúa og laða að fjárfestingar og nýja íbúa.

Búið er að leggja góðan grunn að millilandaflugi en auka þarf tíðni og samfellu allan ársins hring til að fólk hafi fleiri tækifæri til að nýta sér þetta og búa til rekstur sem treystir á þetta.

Stórbættar göngu- og hjólaleiðir geta einnig opnað á nýjar tegundir ferðamennsku á svæðinu, ýtt undir útivist og lýðheilsu ásamt því að draga úr umferðartöfum og kolefnisspori samfélagsins.

Einnig þarf að tala fyrir því að stytta leiðina milli Akureyrar og Reykjavíkur þar sem það dregur úr kostnaði vegna flutninga, lækkar kolefnisspor og er hagkvæmasta stytting á Þjóðveginum sem hægt er að fara í.

Við setjum heilbrigði í forgang með bættri heimahjúkrun og öflugri þjónustu við eldri borgara. Til dæmis með nýjum samkomusal til að efla félagslíf og draga úr félagslegri einangrun. Einnig viljum við vinna með Rauða krossinum til að koma á verkefninu Karlar í skúrum í samvinnu við Skógræktarfélag Eyfirðinga í Kjarnaskógi.

Að auki munum við fara í uppbyggingu lífsgæðakjarna með upphituðum inngarði þar sem eldra fólk og aðrir íbúar Akureyrar geta stundað útivist í þægilegu umhverfi með glatvarma frá nýju gagnaverunum okkar.

Við styðjum öflugt menningar- og íþróttastarf fyrir alla aldurshópa, eflum fjölbreytta viðburði og tryggjum lifandi miðbæ allt árið. Tónlist, listir og menning eru á heimavelli í miðbænum en einnig mætti skoða að halda tónleika í Kjarnaskógi líkt og hefur verið gert með frábærum árangri í Lystigarðinum.

Öflugt menningar- og íþróttastarf stuðlar að auknu mannlífi þar sem ávallt er eitthvað um að vera, sem styður jafnframt við blómstrandi atvinnulíf og uppbyggingu á fjölbreyttari þjónustu.

Með bættri aðstöðu og sterkari umgjörð sköpum við kraftmikið samfélag sem nýtist bæði íbúum og gestum.

Fasteignagjöld hafa hækkað óhóflega með mikilli hækkun húsnæðisverðs á undanförnum árum sem hefur bætt rekstur bæjarins til muna sem hefur oft verið þungur líkt og hjá mörgum öðrum sveitarfélögum.

Við teljum þó ekki rétt að þyngja eigi skattbyrði fólks og fyrirtækja vegna hækkunar á húsnæðisverði umfram almennt verðlag og því verður svigrúmið sem er til staðar nýtt til að lækka fasteignagjöld á íbúa og fyrirtæki og leitast verður eftir því að hagræða í stjórnsýslunni til að fjármagna metnaðarfulla þjónustu bæjarins.

Einnig verður farið yfir fasteignir Akureyrarbæjar og hlutverk þeirra metið til að hámarka hagkvæmni þeirra og nýtingu.

Við munum vinna náið og markvisst með ríkisstjórninni að því að styrkja innviði Akureyrar sem svæðisborgar sem þjónustar allt Norðausturland.

Flokkurinn mun ýta á eftir og liðka til svo ekki verði tafir á stækkun Sjúkrahússins á Akureyri ásamt því að tryggt að ný þyrlusveit Landhelgisgæslunnar verði staðsett hér og hentug staðsetning fyrir þyrlupall verði fundin við sjúkrahúsið.

Verkmenntaskólinn á Akureyri verði stækkaður í takt við vaxandi þarfir atvinnulífsins og að uppbygging nýrra hjúkrunarheimila verði hraðað.

Einnig þarf að ýta á eftir samgöngubótum eins og nýrri brú, hringtorgi og undirgöngum út að Skógarböðum.

Með samvinnu, festu og skýrum kröfum tryggjum við að ríkið standi við sitt gagnvart bæjarbúum.